لو بيجيلك احساس إن الجافا سكريبت كلغة برمجة فيها حاجات غريبة او مش منطقية أو تصرفها بيختلف فده مش حاجة غريبة أو مش عيب فيك بالفعل الجافا سكريبت فيها كل ده بس مش ذنبها كلغة برمجة و دي حاجة متقللش من قوتها بس علشان نفهم ليه الجافا سكريبت بتتصرف بغرابة او عدم منطقية فلازم نفهم تاريخها من البداية علشان نتفهم الموضوع ده لازم نفهم الحكاية من بدايتها ,البداية كانت مع حرب المتصفحات اللي حصلت في التسعينات و وقتها كانت مواقع الإنترنت في بداية انتشارها و كانت امكانيتها ضعيفة لان سرعة الأنترنت كانت ضعيفة جدا و امكانيات الأجهزة كانت ضعيفة في الوقت ده مايكروسوفت كانت مسيطرة جدا علي سوق السوفتوير عموما و أنظمة التشغيل خصوصا و مكنتش مهتمة بالإنترنت و المتصفحات لكن لما الإنترنت بدأت تنتشر و بدأ يكون فيه مواقع كتيرة و حسوا ان الإنترنت هيكون ليه قيمة كبيرة بدأوا يعملوا متصفح الإنترنت اكسبلولر و يدمجوه في نظام التشغيل ويندوز و الحرب كانت مشتعلة بين الإنترنت اكسبلولر و متصفح نيتسكيب و نتسكيب كان بينافس بقوة و بشراسة و في سنة 1995 عملوا حاجة جديدة لغة برمجة بتشتغل علي المتصفح نفسه و هي الجافاسكريبت و كانت وقتها كل مميزاتها انها تعرف تتحكم في شكل الموقع و شكل عناصره يعني مثلا لما تقف علي عنصر لونه يتغير و لا العناصر اللي حواليه شكلها يختلف او انها تعمل خلفيات متحركة يعني في اخر التسعينات انا فاكر ان تقريبا معظم المواقع كانت بتعمل شكل تلج بينزل في شهر ديسمبر كإحتفال بأعياد الميلاد و رأس السنة الجديدة يعني كلها كانت افكار بسيطة جدا و كل الشغل البرمجي المعقد بيتعمل علي السيرفر و يتبعت جاهز للصفحة لكن الموضوع ده في حد ذاته كان ثوري جدا ان يكون فيه لغة برمجة بتتحكم في عناصر الـ HTML و ده معناه أن ممكن يتعمل جزء من الشغل البرمجي علي الـ front end و بغض النظر عن حكاية حرب المتصفحات و مين أنتصر و إيه اللي حصل لأنه مش مجالنا , الفكرة أن دلوقتي بقي عندنا لغة برمجة تشتغل علي المتصفح و بدأت كل المتصفحات تعمل engine يشغل الجافاسكريبت و ده خللي أن سلوك الجافاسكريبت ميكونش واحد في كل مكان لأن ترجمة الجافاسكريبت تختلف من متصفح للتاني و دي اول حاجة غريبة ممكن تشوفها أنك تكون كاتب كود شغال كويس جدا علي متصفح و مش بنفس الطريقة علي متصفح تاني , حاجة كمان تانية ممكن تخللي الجافا سكريبت لغة غريبة علي اللي درسوا لغات برمجة قوية من عائلة الـ C مثلا أي حد راح للجافاسكريبت بعد دراسته للغات برمجة تانية هيحس أنها لغة عشوائية و مش منظمة او مرتبة و بيتعمل فيها حاجات غريبة الفكرة أن الجافاسكريبت لما أتعملت كان هدفها بسيط و انها تعمل شوية حاجات بسيطة و اتطورت مع الوقت علشان تواكب تطور مجال البرمجة و تطور الأجهزة و الشبكات و سرعة الإنترنت فبدأت تتطور واحدة واحدة بناء علي الأسس اللي أتعملت عليها أول ما طلعت فبدأ يظهر كأنه ترقيع بيتعمل علي حاجة مش أصلية أو مش متناسقة مع أساسيتها , يعني اللغة دي الظروف ساعدتها لأنها كانت اللغة الوحيدة اللي بتشتغل علي المتصفح (بعد ما ماسكروسوفت اتهزمت و تخلت عن لغتها للفرونت اند vb script ) و ده خلاها هي تقريبا الوحيدة اللي بتقوم بالدور (الإحصائيات بتقول أن تقريبا 98% من المواقع تقريبا بيكون فيها استخدام للجافاسكريبت) ده و بعد تطور التطبيقات و الأجهزة و المنصات المختلفة بقت الجافاسكريبت هي اللغة اللي بنستخدمها للمواقع و تطبيقات الموبايل و تطبيقات أنترنت الأشياء IOT و الروبوتات و الدرونات و و و و إلخ من إستخدامات الجافاسكريبت يعني حتي لو حسيت أن الجافاسكريبت لغة فيها حاجات غريبة المفروض تحترم رحلة كفاحها في التطور اللي عملته و لازم تتعلمها كويس علشان هتفيدك في أي مجال برمجي هتستخدمه حتي لو مكانتش اللغة الأساسية لشغلك هتحتاجها كلغة مساعدة