ناس كتيرة بيكونوا عايزين يحسنوا من توافق موقعهم مع محركات البحث و بيشوفوا أن أسرع طريقة أنهم يشتروا باك لينك فهل دي فعلا أحسن طريقة؟
بالنسبة لي دي أسوأ حاجة ممكن تعملها لموقعك حتي لو فعلا حققت نتيجة فهي هتكون نتيجة مؤقتة و مع أول تحديث هتلاقي عقاب جوجل أصابك بشدة, طيب ليه؟ في الأول يعني أصلا الباك لينك هو ببساطة لما حد يلاقيك كاتب كلام مهم و مفيد علي موقعك فيسترشد بكلامك ده في صفحة من صفحات موقعه و يناقش فكرتك أو ياخدها مرجع يوضح بيها نقطة ما او يكون مثلا بيتكلم عن مشكلة و حلها عندك او بيشير مثلا لتطبيق علي موقعك المهم أنها هتكون حاجة مفيدة لجمهوره و زواره و حاجة مرتبطة بالموضوع اللي هو بيتكلم فيه و ده اعلى جودة باك لينك ممكن تاخده و هو ده اللي جوجل بيدور عليه إشارة من ناس تانية إن عندك محتوي مفيد في موضوع معين و هنا أساس الموضوع أن يكون عندك محتوي مفيد في موضوع معين محتوي مفيد للزائر يجاوب عن سؤاله اللي بيبحث عنه علي جوجل , الكارثة الكبيرة لما صاحب الموقع ميهتمش بالمحتوي و ميقدمش أي إفادة و لا تجربة مستخدم مميزة و يروح يدور علي حد يدفع له فلوس و يعمله جيست بوست guest post أو مقالة في موضوع معين و يعملها لينك علي صفحة من صفحات موقعه دي أسوأ حاجة ممكن تعملها ليه؟ و إزاي جوجل هيعرف أصلا؟ ببساطة و من غير دخول في تفاصيل معقدة و لا مسميات مكلكعة لما الزائر يدخل موقعك و ميكملش كام ثانية و يقفل لانه ملقاش حاجة مفيدة أو ميتنقلش بين صفحات موقعك أو يتجنب دخوله تاني يعني ميرجعش يفتحه تاني و تحليل محتواك بالنسبة لجوجل سيء جدا وقتها السؤال أنت أزاي بالمحتوى السيء ده واخد باك لينك علي أي أساس أكيد ده باك لينك مش شرعي و بدل ما تعلي ترتيب موقعك هتلاقيه بينزل و درجاته عند جوجل بتقل ده غير إن اللي بيعملك باك لينك ده و بيعمله بغرض الربح فمش فارقة معاه الموقع اللي بيعمله باك لينك جيد و لا متميز فمع الوقت الموقع اللي بيعمل كده بيبقي سمعته سيئة عند جوجل و بالتالي كل اللي بيديهم باك لينك هياخدوا سمعة سيئة فدي فعلا أسوأ حاجة ممكن تعملها.
فكرة الـ SEO ببساطة أنك ترضي الزائر مش ترضي جوجل , لو الزائر أنبسط منك جوجل هينبسط منك و يطلع موقعك في أول النتائج لكن مهما حاولت ترضي جوجل و أنت مش مهتم بتجربة الزائر فكل اللي بتعمله مجهود و وقت و فلوس ضايعين بدون نتيجة