سؤال بيتكرر كتير بصيغ مختلفة شباب كتير لما بيبداوا يتعلموا برمجة بيقفوا كتير عن يتعلموا إيه؟ بيشغلهم جدا لا شعوريا مبدأ إقتصادي و هو تكلفة الفرصة البديلة لا شعوريا الإنسان بيفكر ديما بالمبدأ ده هل لو ضيعت وقت و مجهود و فلوس علي استثمار معين هيكون أحسن و لا لو دخلت في استثمار تاني, كلنا بنفكر بالنمط ده و هو نمط مش غلط في العموم لكن المهم ميتوهناش طيب أحل المعضلة دي إزاي لما أجي أختار لغة برمجة أو تكنولوجيا أشتغل بيها أختار إيه, طيب في البداية السؤال ده بيتسئل لكن مش في محله معظم الشباب بيسألوا السؤال ده علشان يعرفوا هل المجال اللي هيدرسوه هيكسبوا منه فلوس كتير و هيلاقوا شغل في المجال ده , السؤال كده بيفقد معناه ببساطة لان كل المجالات بتكسب فلوس كتيرة للمتميزين فيها و الناجحين المجال نفسه مش هيفرق كتير اه في المتوسط بيفرق أكيد يعني ممكن مثلا تلاقي متوسط مرتبات مبرمجين الـ php مثلا 1000 و متوسط مرتبات مبرمجين الـ .net مثلا 1200 ده مش معناه أنك لو تخصصت php بالضرورة هتاخد مرتب أقل عادي ممكن مبرمج php يكون بيقبض أكتر بكتير من مبرمج الـ .net ببساطة لو هو أشطر منه و أنجح منه يعني متوسط المرتبات مش مقياس أبدا طيب سؤال تاني هل هلاقي شغل لما ادرس المجال الفلاني؟ هل عليه طلب؟ الإجابة كل المجالات عليها طلب و وظائف عايز تتطمن أدخل كده تابع الوظائف علي لينكد إن و شوف الشركات بتطلب ايه و ادخل upwork و شوف المشروعات المطلوبة في كل لغات البرمجة و قارن بين اسعارها و عددها و المنافسة , طيب إيه المعيار اللي أحكم بيه أنا هتعلم إيه؟بالنسبة لي الأهم من أنك تعرف هتلاقي شغل و لا لا تعرف أنت بتحب إيه و عايز تعمل ايه تتخصص في إيه و وقتها هتعرف تختار اللغة أو التكنولوجي اللي هتتخصص فيه , مثلا ناوي تكون مبرمج بس و لا هتدرس برمجة علشان تجمع بين مجالك و البرمجة يعني مثلا أنت دارس محاسبة و حابب تعمل تطبيقات محاسبية و هكذ أو أنك عايز تبقي مبرمج تعمل مواقع للشركات و الأفراد يغلب عليها جمال التصميم و الفن و لا عايز تعمل تطبيقات موبايل, حاجات كتيرة بتحددها و بعدها بتقرا و تشوف كل تكنولوجي مريحة في إيه أكتر (تقريبا ممكن تعمل اي حاجة من الحاجات الشائعة بأي تكنولوجي لكن فيه تكنولوجيات بتكون اسهل في مهام معينة) مثال علي طريقة التفكير دي مثلا لو عايز تبقي full stack و تعمل مواقع بسيطة للشركات بيغلب عليها جمال التصميم فأحسن حاجة أنك تتعلم جافاسكريبت للـ front end و هتعرف تستخدمها في الـ back-end بسهولة بإستخدام الـ node js هتكتب نفس اللغة و مش هتكون محتاج تتعلم أكتر من لغة , طيب لو عايز تعمل مواقع و تطبيقات لسطح المكتب ممكن تتعلم .net , و لو أنك ممكن دلوقتي تعمل تطبيقات سطح المكتب بالجافاسكريبت عادي و ده اللي كنت أقصده لما بقولك أغلب المهمام البرمجية الشائعة ممكن كل اللغات تعملها أو أغلبها لكن بيفرق سهولة التعلم و التقنيات, تاني حاجة ممكن تقارن بيها أنك تكون حابب اللغة و طريقة استخدامها و تكون بالنسبة لك سهلة و دي ممكن تعملها بإنك تشوف درسين تلاتة عن حاجة معينة باللغات اللي محتار بينهم تشوف نفس الحاجة بتتعمل ازاي و وقتها ممكن تحدد أنت تفضل أنهي لغة.
نقطة تانية مهمة جدا أصعب لغة برمجة هتتعلمها هي أول لغة برمجة و بعدها هتقدر تتعلم بسهولة أي لغة برمجة لأن المفاهيم واحدة تقريبا و السوق هيجبرك في أوقات كتيرة علي تعلم لغات تانية و تكنولوجيات تانية.
في الأخر مش مهم جدا إختيارك أنت هتتعلم ايه المهم تتعلم و متقعدش كتير في مرحلة حيرة و تخللي تفكيرك ده يكون عائق ليك للتعلم , و المهم كمان أنك تكمل برنامج تعليمي للأخر متكونش مشتت مش تمشي في مسار و بعدين تزهق أو تحس أنك لو كنت درست حاجة تانية كانت هتكون أسهل بالنسبة لك فتسيب المسار اللي كنت شغال فيه و تروح لمسار تاني و هكذا و في الأخر تلاقي نفسك ضيعت وقت كتير و متعلمتش حاجة بشكل يخليك محترف فيها