كتير من الناس بيسألوا سؤال بالمعني ده هل أنا كبرت علي تعلم البرمجة , طيب الإجابة المختصرة لا البرمجة ملهاش سن , لكن مش هي دي كل القصة أو مش بتتحسب بالشكل ده , الفكرة أنت عايز تتعلم البرمجة ليه؟ و هتشتغلها إزاي؟ , لو إجابتك عايز اتعلمها علشان مش عاجبني المرتب اللي باخده و عايز اعمل تغيير مسار وظيفي علشان أشتغل في شركة مالتي ناشونال و أقبض مرتب كبير يبقي متتعلمهاش أحسن, طيب ليه و تتعلمها إمتي؟ لما يكون عندك شغف بالبرمجة و عايز تستخدمها كأداة لتطوير نفسك بيها , البرمجة في حد ذاتها مش غاية هي وسيلة مهمة تمكنك من تطوير قدراتك مش هي كل حاجة و في المستقبل القريب هيكون أغلب خريجين المدارس و الجامعات درسوا برمجة أثناء الدراسة و مش لازم كل دول يشتغلوا مبرمجين الفكرة أن البرمجة هتكون جزء من حياتنا و عادتنا زي ما بنعرف نشغل الكمبيوتر و الموبايل هنعرف مباديء كتابة الكود و نعرف نعمل تطبيقات بسيطة ده التطور الطبيعي للمعرفة البشرية, يعني الدكتور و المهندس و المحامي و الصيدلي هيعرفوا برمجة و هيستخدموها في تطوير مهاراتهم الوظيفية و ده تحديدا اللي ممكن تستفيد منه و هقولك إزاي في الأول هقولك ليه لو عايز تشتغل في شركة كبيرة و تقبض فلوس كتيرة متتعلمهاش , لو أنت متخصص في حاجة معينة و مش عارف تنجح فيها و تحقق مرتب كبير ده معناه أن فيه مشكلة عندك مش في الحاجة اللي أنت متخصص فيها كل المجالات ممكن تعمل عائد مادي كويس لو نجحت فيها متفتكرش أنك لما تغير المجال حياتك هتختلف كتير , كمان لو فاكر انك و انت عندك 30 و لا 40 و لا 50 سنة و اتعلمت برمجة هتدخل شركة كبيرة فدا صعب برضه ليه شركة تعين مبرمج جونيور في نفس سن التيم ليدر ده غير إننا لما بنكبر في السن قدراتنا علي الشغل الشاق اللي بيشتغلوه الجونيورز بتقل كتير جدا كمان ازاي هتعين واحد سنة كبير المفروض اللي قده في السن بياخدوا مرتبات كبيرة و تدخله من أول السلم الوظيفي و ياخد مرتب قليل كلها مش منطقية , يعني متتعلمش؟ لا تتعلم بس متسبش مجالك اللي قضيت فيه سنيين طويلة و اخدت خبرة كبيرة فيه استغل البرمجة في تطوير قدراتك في شغلك و مجالك لو انت صيدلي إتعلم برمجة و هتكون أجدر حد يعمل تطبيق إدارة صيدليات لان مهما كان المبرمج أتشرح له طريقة شغلك عمره ما هيفهمه زيك , لو أنت محامي إتعلم برمجة و إتخصص في عقود شركات البرمجة و النزاعات القضائية بينهم لانك وقتها هتكون اجدر من أي محامي لانك فاهم الموضوع بعمق, لو أنت مهندس ميكانيكا إتعلم برمجة الماكينات و الالات و طور من شغلك , هكذا , هتلاقي ديما طريقة أنك تستخدم بيها البرمجة في تطوير شغلك , حاول ديما انك مترميش سنيين طويلة من الخبرة إكتسبتها في مجال معين و تبدأ من الصفر مع أنك ممكن تبدأ بالبرمجة من حيث ما وقفت في كاريرك , و وقتها فعلا ممكن تشتغل مبرمج في شركة كبيرة لان خبرتك هتكون مهمة يعني لو شركة مثلا بتعمل تطبيق حسابات و أنت قضيت عشر سنيين من عمرك محاسب و دلوقتي متعلم برمجة وقتها هتكون أهم بالنسبة لهم من المبرمج العادي لانك فاهم في اللي بيعملوه أكتر من المبرمجين العاديين وقتها ممكن تشتغل استشاري مش مجرد مبرمج لسه باديء كاريره و في النهاية ممكن ديما تشتغل لحسابك العمل الحر هيغنيك عن نظرة الشركات ليك, المهم تعرف تعمل تسويق كويس لنفسك.